Enerxía: Tipos, Fontes e Centrais Eléctricas

Enerxía: Fontes e Formas

A enerxía está presente en todos os cambios e transformacións que teñen lugar no universo. É a magnitude desencadeante de todos eses cambios, imprescindible para poder realizar calquera forza que provoque un desprazamento, unha deformación, etc. Existen multitude de recursos de onde podemos obter a enerxía. Son as chamadas fontes de enerxía: o sol, a auga, o vento, os combustibles fósiles, os residuos sólidos urbanos (RSU), etc. A enerxía maniféstase de diferentes xeitos: en forma de calor, luz, movemento,... Estas son as formas de enerxía.

Enerxía Eléctrica

A forma de enerxía maioritariamente utilizada nas sociedades actuais é a enerxía eléctrica. De feito, un dos indicadores do desenvolvemento industrial e económico dun país, cidade, comunidade,... é o seu nivel de consumo de enerxía eléctrica. A enerxía eléctrica prodúcese en grandes cantidades en centrais, que abastecen a poboacións e industrias que poden estar a moitos quilómetros de distancia. Tamén se fomenta a produción para autoabastecemento, en pequenas cantidades.

Centrais Eléctricas

Dependendo da fonte de enerxía que utilicemos para obter enerxía eléctrica, teremos un tipo de central ou outra:

• Centrais Térmicas: Aproveitan a calor obtida de diferentes fontes.
• Centrais Hidroeléctricas: Aproveitan a enerxía da auga dun encoro.
• Centrais Eólicas: Aproveitan a enerxía do vento.
• Centrais Solares Fotovoltaicas: Aproveitan a luz do sol.

Centrais Térmicas Convencionais

Nunha central térmica convencional queimamos un combustible fósil (carbón, petróleo ou gas natural). Coa calor desprendida da combustión quentamos auga, ata levala ao punto de ebulición. Transfórmase en vapor de auga, que facemos saír a presión ata que incida sobre as aspas dunha turbina. A turbina é solidaria ao eixo dun alternador. Ao xirar a turbina facemos que xire o rotor do alternador, inducindo corrente alterna no estator.

Centrais Térmicas Nucleares

Bombardeamos núcleos de uranio con neutróns. Deste xeito conseguimos romper os núcleos, desprendendo así calor. Os núcleos rompen cada vez en anacos máis pequenos, facendo unha reacción en cadea. Coa calor desprendida da rotura dos núcleos quentamos auga, ata levala ao punto de ebulición. Transfórmase en vapor de auga, que facemos saír a presión ata que incida sobre as aspas dunha turbina. A turbina é solidaria ao eixo dun alternador. Ao xirar a turbina facemos que xire o rotor do alternador, inducindo corrente alterna no estator.

Central Solar Térmica

Aproveitamos a calor do sol para quentar auga. Como esta calor non sería suficiente para levar a auga ao punto de ebulición, necesitamos concentrar a calor do sol nun punto, facendo efecto lupa. Conseguímolo utilizando uns heliostatos. Os heliostatos están formados por espellos móbiles de forma parabólica, que van xirando ao longo do día para ter en todo momento a orientación óptima, que lles permita captar a maior cantidade de calor do sol. Coa calor así obtida quentamos auga, ata levala ao punto de ebulición. Transfórmase en vapor de auga, que facemos saír a presión ata que incida sobre as aspas dunha turbina. A turbina é solidaria ao eixo dun alternador. Ao xirar a turbina facemos que xire o rotor do alternador, inducindo corrente alterna no estator.

Enerxía Eólica

Aproveitamos o vento para mover as aspas dun aeroxerador. Para conseguir que o alternador produza corrente alterna precisamos que o rotor xire dentro do estator a grande velocidade. Polo tanto, a turbina debe xirar moi rápido. Para isto, colocamos un multiplicador solidario ao eixo das aspas e ao da turbina, de maneira que a turbina adquira maior velocidade que as aspas do aeroxerador. Ao xirar a turbina facemos que xire o rotor do alternador, inducindo corrente alterna no estator.

Centrais Hidroeléctricas

Neste tipo de centrais partimos da enerxía potencial de auga embalsada nun encoro. Esta auga atópase a grande altura, e facémola baixar por unha canle, na cal se vai transformando a enerxía potencial en enerxía cinética. Esa auga chega con moita forza ás aspas dunha turbina, facendo que esta xire. A turbina é solidaria ao eixo dun alternador. Ao xirar a turbina facemos que xire o rotor do alternador, inducindo corrente alterna no estator.

Central Solar Fotovoltaica

Obtemos enerxía eléctrica partindo da luz do sol. Para iso contamos con células fotovoltaicas. Os paneis fotovoltaicos están construídos con material semicondutor. Os semicondutores poden comportarse como condutores ou illantes. En repouso serán illantes, pero se conseguimos darlles enerxía suficiente para que empecen a moverse, uns empuxarán a outros producindo así corrente continua. Ao igual que os heliostatos, os paneis fotovoltaicos están colocados sobre uns soportes que xiran ao longo do día, para ter en todo momento a orientación óptima que lles permita aproveitar a máxima cantidade de luz. A corrente continua non pode ser transportada, só se pode almacenar en pequenas cantidades ou consumir no lugar onde se produce. Polo tanto, para poder transportala precisaremos uns conversores de corrente continua en corrente alterna.